Ir-Rotta Diġitali ta’ DiscoverEU

Qed tfittex ideat dwar fejn tivvjaġġa waqt l-avventura ta’ DiscoverEU tiegħek? Qatt staqsejt kif tista’ tkun belt tal-futur?

Din hi l-opportunità tiegħek li tesplora l-bliet ta’ għada! L-introduzzjoni tar-Rotta Diġitali, mappa ta’ bliet Ewropej diġitalment intelliġenti, li kollha kemm huma qed iwittu t-triq billi jużaw teknoloġiji diġitali fil-bini, fit-toroq u fl-ambjenti tagħhom. F’ħafna minn dawn il-bliet, tista’ tikkonnettja mal-WiFi b’xejn f’żoni pubbliċi, tuża app biex tiċċekkja kemm-il minuta ’l bogħod tinsab il-karozza tal-linja li jmiss, jew tirkeb rota elettronika biex tiskopri l-belt.

Xi wħud minn dawn il-bliet jiftaħru bit-titlu ta’ Kapitali Ewropea tal-Innovazzjoni – bliet rikonoxxuti mill-UE għas-soluzzjonijiet innovattivi tagħhom għal sfidi bħat-trasport u l-aċċess għas-servizzi pubbliċi. Oħrajn huma “bliet intelliġenti” li jużaw id-data u l-intelliġenza artifiċjali biex jagħmlu l-operazzjonijiet tal-bliet – bħat-tidwil tat-toroq jew il-ġbir tal-iskart – aktar effiċjenti, jew “bliet intelliġenti” li jużaw teknoloġiji mill-aktar avvanzati biex itejbu l-ħajja għar-residenti b’mod ekoloġiku, sostenibbli u responsabbli. Ħafna mill-bliet tul ir-rotta joffru wkoll sessjonijiet ta’ taħriġ għar-residenti biex itejbu l-ħiliet diġitali tagħhom.

Dawn il-bliet jinsabu fuq quddiem nett ta’ #DigitalEU, u jwittu t-triq għall-futur flimkien ma’ inizjattivi bħall-Programm Ewropa Diġitali u #WiFi4EU – għalhekk agħti daqqa t’għajn lejn il-mappa ta’ hawn taħt u esplorahom f’aktar dettall! Skopri aktar – jekk int interessat fis-sostenibbiltà u tixtieq iżżid ftit bliet ekoloġiċi fl-itinerarju tal-ivvjaġġar tiegħek, allura għaliex ma teżaminax ukoll ir-Rotta Ekoloġika ta’ DiscoverEU?